Ég stóð upp úr leðursófanum svarta
og slökkti á flatskjánum nýja.
Í úlpu frá sextíu og sex gráðum norður
smokraði ég mér hlýja.
Svo fór ég á jeppanum fjórhjóladrifna
(mér finnst hann þvílíkt æði)
niður í bæ og var fljótur í förum,
en fann hvergi bílastæði.
Ég lagði því bílnum á umferðareyju
innan um fleiri jeppa,
fannst eðlilegt að ég ætti við sektir
og óþarfa vesen að sleppa.
Ég keypti í leiðinni kleinuhringa,
karamellufyllta,
og kókosbollu og café latte
með kortinu mínu gyllta.
Svo arkaði ég út á Austurvöllinn
og öskraði mikið og hátt
um það sem aðrir þurfa að gera
því að ég á svo bágt.
4 ummæli:
Öskrandi snilld.
Þetta er gott - og satt.
Mér þykir það þó óneitanlega alltaf fallegri kveðskapur sem fylgir gnýstuðlareglum, en það er sjálfsagt bara einhver sérvizka í mér.
Þessi athugasemd á kannski ekki heima hér en ég vildi skilja eftir komment um grein þína "Umburðarlyndi andskotans". Ég komst ekki í þá grein á bloggsíðu þinni svo ég set kommentið hér við þessa nýjustu færslu þína. Kommentið er eftirfarandi: það virðist sem boðskapur umræddrar greinar sé á endanum sá að við eigum ekki að umbera samtök sem beinast gegn trú af ákveðnum toga, í þessu falli trú múslíma. En hvað ef við erum þeirra skoðunar að trú múslíma standi í andstöðu við grundvallar hugmyndir um samfélagsskipan og mannréttindi á vesturlöndum, samanber vel rökstuddar skoðanir fólks eins og Ayaan Hirsi Ali (http://en.wikipedia.org/wiki/Ayaan_Hirsi_Ali)? Eigum við þá ekki einmitt að berjast gegn þeim áhrifum og ekki sýna "umburðarlyndi" eins og þú nefnir í grein þinni? Eigum við að "umbera" styrkingu trúar á Íslandi sem með beinum hætti boðar baráttu gegn mörgum þeim gildum sem grundvalla hugmyndir vesturlandabúa um mannréttindi? Boðskapur greinar þinnar er að mínu mati góður en niðurstaðan ekki nægilega ígrunduð og jafnvel í andstöðu við boðskapinn.
Tinna: Ég veit að þetta er óttalegur leir, einkum fyrsta erindið. Ég ákvað samt að láta þetta flakka. Mér fannst þetta nógu sniðugt og satt til að réttlæta bágborna bragfræði.
RR: Með fullri virðingu fyrir Ayaan Hirsi Ali þá hafa íslensk stjórnvöld ekki skuldbundið sig til að stjórnast af skoðunum hennar. Þau hafa aftur á móti skuldbundið sig til að virða mannréttindi eins og þau eru skilgreind, t.d. í mannréttindayfirlýsingu SÞ. Sjá nánar hér: http://deetheejay.blogspot.com/2010/11/enn-um-mosku-i-reykjavik.html
Skrifa ummæli