þriðjudagur, október 20, 2009

Vígð smámenni

Kristur tók sér alltaf stöðu með hinum kúguðu og forsmáðu, gegn kúgurum og valdníðingum. Kirkja sem ekki gerir það getur ekki gert neina kröfu til þess að teljast kirkja Krists á jörð. Þetta er svona einfalt. Stofnun sem tekur sér stöðu með þeim sem uppvís hefur orðið að siðferðisbroti, gegn fórnarlömbunum, er ekki kirkja heldur ömurleg afskræming alls þess sem kirkja á að vera.
Kirkja er samfélag. Hagmsunir samfélags verða alltaf að vega þyngra en hagsmunir einstaklinganna sem þjóna því. Kirkjunni ber ávallt að vera stærri en persónuleikarnir sem gegna embættum á vegum hennar. Því miður hefur mörgum klerkum þó að undanförnu virst með öllu fyrirmunað að taka velferð kirkjunnar fram yfir persónulega hagsmuni sína, of blindaðir af embættisást til að sjá tjónið sem þeir valda. Nema þeim sé skítsama. Afraksturinn er trausti rúin Þjóðkirkja.
Nýjasta dæmið er mál Gunnars Björnssonar. Þar sem hann var sýknaður af ákæru um kynferðisbrot, bæði í héraði og í Hæstarétti, telur hann sig geta snúið aftur í embætti sitt eins og ekkert hafi í skorist, þrátt fyrir að rannsókn málsins hafi leitt í ljós að hann strauk unglingsstúlkum og kyssti þær, þrátt fyrir að sóknarnefnd hafi lagst gegn því að hann snúi aftur til starfa og Fagráð Þjóðkirkjunnar um kynferðisbrot sé sama sinnis. Aukinheldur rauf hann bæði vígslueið sinn, „að vera öðrum til fyrirmyndar og styrktar í sannri trú og grandvöru líferni“, og braut siðareglur Prestafélags Íslands þar sem segir: „Prestur má ekki undir neinum kringumstæðum misnota aðstöðu sína sem sálusorgari eða ógna velferð skjólstæðings, s.s. með kynferðislegri áreitni, né vanvirða tilfinningar hans og tiltrú með öðrum hætti“. Þótt dómstólar telji framferði hans ekki falla undir skilgreininguna á kynferðislegri áreitni er óvefengjanlegt að tilfinningar stúlknanna voru vanvirtar og tiltrú þeirra ógnað.
Úrskurðarnefnd Þjóðkirkjunnar telur að Gunnar hafi gerst sekur um ótvírætt siðferðisbrot þótt hún treysti sér ekki til að mæla með því við biskup að hann yrði sviptur brauðinu. Ástæða þess er einfaldlega sú að vegna einhvers, sem aðeins getur verið handvömm við samningu starfsreglna nefndarinnar, hefur hún engin úrræði að grípa til vegna siðferðisbrota. Þegar framin eru svokölluð agabrot horfir málið öðruvísi við. Þá getur hún mælt með tafarlausri brottvikningu. Gunnar var af einhverjum óskiljanlegum ástæðum ekki fundinn sekur um agabrot.
Biskupi var því vandi á höndum. Hann þurfti að ákveða hvað gera skyldi við prest, margsekan um siðferðisbrot, sem sóknarnefnd vildi losna við, en sem nýtur verndar laga um starfsöryggi opinberra starfsmanna, þótt fráleitt sé að ætla að þau hafi verið sett í þeim tilgangi að vernda trúarleiðtoga sem káfa á börnum. Ólögmæt brottvikning hefði getað kostað himinháar skaðabætur. Sýnir þetta auðvitað betur en nokkuð annað hve brýnt það er að um Þjóðkirkjuna fari að gilda sömu lög og um trúfélög almennt. Hvernig getur kirkja, sem er með öllu úrræðalaus gagnvart siðferðisbrotum þjóna sinna, ætlast til þess að á henni sé tekið mark um siðferðileg álitamál? Ekki þarf að fara í neinar grafgötur með það hvernig brugðist yrði við ef starfsmaður annarrar æskulýðsstarfssemi yrði uppvís að sams konar siðferðisbroti.
Biskup kvað upp sannkallaðan Salómonsúrskurð. Gunnar skyldi halda starfi, en vera falin önnur verkefni, þar sem hæfileikar hans njóta sín og ekki er krafist náinnar umgengni við börn undir lögaldri. Gunnar kaus hins vegar að hrækja á þessa líflínu, sem biskup af mildi sinni varpaði til hans, með því að lýsa því yfir að hann myndi hunsa þessi fyrirmæli. Nú er aðeins hægt að vona að þá lítilsvirðingu, sem Gunnar sýnir persónu biskups Íslands og valdi hans, sem æðsta embættismanns Þjóðkirkjunnar, með viðbrögðum sínum, megi skilgreina sem agabrotið sem svo sárlega vantar á ferilsskrá hans til að hægt sé með lögmætum hætti að svipta hann hempunni í eitt skipti fyrir öll.
Tíu prestar hafa lýst yfir stuðingi við Gunnar í baráttu hans fyrir brauðinu. Það er sorglegt. Enn sorglegra er þó að aðrir prestar Þjóðkirkjunnar, sem telja á annað hundraðið, skuli þegja þunnu hljóði í stað þess að fylkja liði að baki biskupi sínum. Að mínu mati ber þeim tafarlaust að lýsa yfir algjörum stuðningi við biskup í því mikilvæga verkefni sem hann virðist, til allrar hamingju, ætla að taka sér fyrir hendur: Að sýna í verki að Þjóðkirkjan vill að sönnu vera kirkja Krists á jörð en ekki hagsmunagæsla fyrir vígð smámenni.
Grein í Fréttablaðinu 19. október 2009
Viðbót 20. okt: Til að sanngirni sé gætt er rétt að fram komi að prestar höfðu tjáð sig um málið áður en grein þessi birtist, a.m.k. sr. Guðbjörg Jóhannesdóttir í aldeilis glimrandi prédikun, sem farið hafði fram hjá mér. Sama dag og þessi grein birtust gengu sr. Örn Bárður Jónsson og sr. Sigríður Anna Pálsdóttir ennfremur fram fyrir skjöldu og tóku afdráttarlausa afstöðu með biskupi. Líklega litu flestir prestar svo á að ljóst væri að þeir sem ekki styddu Gunnar styddu biskup. Að mínu mati var það ranglega ályktað hjá þeim.

5 ummæli:

Nafnlaus sagði...

Frábær grein hjá þér minn kæri skólabróðir. Sérstaklega flott hvernig þú byrjar greinina :o))))
Kv, Lára skólasyss

innevS sagði...

Virkilega góð grein. Skil ekki hvernig menn gætu mælt nokkuð á móti þessu. Þetta hefur verið svo augljós eiginhagsmunagæsla Gunnars að ég skil ekki hvernig hann getur ennþá verið að ibba gogg. Algjörlega siðblindur og tillitslaus.
And now for something completely different:
Vonandi er ég ekki dónalegur, en hefur þú, Davíð, einhverja hugmynd um nákvæmlega hve margar radíus-flugur þið Steinn Ármann tókuð upp?
Ég og nokkrir vinir mínir erum vægast sagt háðir þessum flugum og kunnum 130.0 flugur nokkurn veginn utanað, en grunar að það séu fleiri faldar flugur einhvers staðar. Ég er ekki að ætlast til að þú farir að vandræðast í þessu sjálfur, en ef þú hefur hugmynd um einhvern mann, stað eða geymslu þar sem upptökur gætu leynst, þá væri það ótrúlega vel þegið.

Takk fyrir að nenna að lesa svona langt comments, Sveinn Orri Snæland

Davíð Þór sagði...

Veit ekki hvað þær voru margar en er nokkuð viss um að 130 sé innan við helmingur. Upptökurnar okkar eru týndar, en ef þú átt 130 þætti mér afar vænt um ef þú gætir gefið mér eintak.

Nafnlaus sagði...

Já. Eða... Já. (*)
Reyndar eru allir þessir þættir komnir á youtube. Þetta er líklega komið af gamaldags útvarps-upptökum, t.d. af TDK-spólum. (*) Við félagarnir erum búnir að reyna að hafa upp á fleirum með facebook hóp en ekkert virðist ætla að bætast við. Er ekki tilvalið ef það eykur líkur á betri heimtum að þú auglýsir bara eftir þessu í einhverjum miðlinum sem þú hefur aðgang að? Hefðirðu áhuga á því ef svo væri? (*)
Annars er minnsta málið fyrir mig að koma þessu til þín á því formi sem þú vilt. Svo lengi sem það fer ekki í einhvern hommagang. (*)
Svo eigum við reyndar líka hina afar sérstöku útvarpsleikritaröð, Radíusbræður leysa vandann. Það voru 12 þættir. Því miður er margt af þessu í frekar lélegu formi, þ.e. slæmar upptökur.
En allavega, ekki hika við að hafa samband, Sveinn Orri Snæland (Sveinki Radíus) (*)

(*) Þessar vísanir í flugur eru eingöngu ætlaðar til þess að gleðja félaga mína og sam-aðdáendur, vonandi rýrir það ekki álit þitt á mér, ef nokkuð álit var til staðar.

innevS sagði...

Ekkert mál. Hvernig viltu að flugurnar komi til þín?

Kveðja, Sveinn Orri Snæland